Sports (Tayosame News) Real Madrid ayaa ku dacweysay kooxda Inter Milan xiriirka kubada cagta adduunka ee FIFA madaama ay ceyrsanayaan xiddigooda khadka dhexe Luka Modric.
Afhayeen u hadlay FIFA ayaa xaqiijiyay in xiriirka kubada cagta adduunka inuu dacwad ka helay kooxda reer Spain oo la xiriirta iskudayga kooxda ka dhisan Serie A ay ku dooneyso inay kula soo wareegto xiddiga reer Croatia Luka Modric.
Iyadoo suuqa kala iibsiga Talyaaniga uu xirmayo caawa fiidkii, waxa ay u muuqataa in Inter Milan aysan ku guuleysan doonin howlgalkooda ay ku doonayaan inay Modric kaga soo kaxeeyaan Bernabeu.
Sky Sports laanteeda afka Talyaaniga ayaa sheegtay in ismaandhaaf hor leh uu soo kala dhexgalay wakiilada xiddiga khadka dhexe iyo madaxweynaha Real Madrid Floentino Perez islamarkaana lagu celceliyay in rabitaanka ciyaaryahanka uu yahay inuu baxo.
Si kastaba, waxaa la fahamsan yahay in madaxweyne Perez inuusan dooneynin inuu ka fekero suurtogalnimada uu xiddiga gaaray finalka Koobka Adduunka uu ugu dhaqaaqo Italy.
32 jirkaan ayaa bedel ku soo galay qeybtii labaad ee kulankii UEFA Super Cup oo ay 4-2 ku badisay kooxda Atletico Madrid.
Waxa uu kulankaas ahaa kulankii ugu horeysay ee ay Real Madrid ciyaarto tan iyo markii uu Cristiano Ronaldo uu heshiis 105 milyan ginni ugu wareegay Juventus xagaagan iyo tan iyo markii uu tababare Julen Lopetegui uu bedelay Zinedine Zidane.
