London (Tayosame News) Tababaraha kooxda Chelsea ee Maurizio Sarri ayaa sheegay in garabka kooxdiisa ee Eden Hazard uu mar uun ka fiicnaan doono xiddigaha 10-kii sano ee u dambeeyay ka talinayay kubadda cagta ee Lionel Messi iyo Cristiano Ronaldo balse ay waxkasta ku xidhnaan doonaan isaga iyo dadaaladiisa.
Hazard ayaa lix sano oo cajiib ah ku qaatay Blues iyadoo lixdaa sano si joogto ah loola bar-bardhigayay Ronaldo iyo Messi walow aysan marnaba xogta laga ururiyay la heer noqon midka xiddigahaas gaar ahaan dhinaca gool dhalinta.
Haddaba, Sarri ayaa sheegay in Hazard uu samayn karo horumar isla markaana uu noqon karo midka ugu fiican, 59 jirkan oo ka hadlaya arrimahaas ayaana hadalkiisa ku bilaabay “Waxaynu ka hadlaynaa mid kamid ah xiddigaha ugu muhiimsan ee qaarada Yurub ku sugan haatan, Fikiradeyda, Wuu horumari karaa waxa uu noqon karaa midka ugu fiican”
“Isaga ayay ku xidhantahay, Midka ugu fiican dhinaca farsamada, Midka ugu fiican dhinaca gool dhalinta laakiin waxaan filayaa inay kaliya ku xidhantahay isaga”
27 jirkan ayaa xilli ciyaareedkiisii toddobaad la bilaabanaya kooxda ree London waxaana uu laba kamid ah lixdii sano ee hore kulasoo guuleystay horyaalka Premier League isagoo hal mar noqday xiddiga sanadka ee horyaalka.
Hazard oo uu toddobaadyadii ugu dambeeyay shaki weyni hadheeyay mustaqbalkiisa Chelsea ayaa caawa kusoo bilaaban kara kulankiisii ugu horreeyay ee horyaalka ee xilli ciyaareedkan marka ay Stamford Bridge kusoo dhawaynayaan kooxda ay magaalo wadaagta yihiin ee Arsenal.
