Uganda (Tayosame News) Booliiska dalka Uganda ayaa waxay sheegeen in ay xireen in ka badan 70 qof ka dib dibadbax ka dhacay caasimadda dalkaasi ee Kampala.
Boliiska ayaa isticmaalay suntan dadka ka ilmaysiisa iyo rasaas si ay u kala ceyriyaan dibadbaxayaasha.
Dibadbaxayaasha ayaa waxa ay ka cabanayeen jirdil la sheegay in loo gaystay xildhibaan ka tirsan mucaaradka.
Xildhibaankani oo lagu magacaabo Bobby Wine ayaa sidoo kale ah fanaan caan ah.
Madaxwaynaha dalka Uganda Yoweri Museveni ayaa ku tilmaamay warar been abuur ah in jirdil loo gaystay Bobby Wine oo xabsiga ku jira.
Xildhibaankan ayaa la xiray ka dib markii sida la sheegay la dhagaxyeeyay kolanyo uu la socday madaxwaynaha dalkaasi.
Xaaskiisa ayaa horey u sheegtay in seygeeda jirdil loogu gaystay xabsiga dhexdiisa.
Qoyskiisa ayaa waxa ay sidoo kale sheegeen in xaaladiisa ay ka sii dareyso islamarkana lagu duray waxyaabo aan la garanayn.
