Berbera (HP): Gaadiidleyda ka dhex shaqeeya magaaladda Berbera ee xarunta gobolka Saaxil ayaa cabasho xoogan ka muujiyay qiimaha lagu iibiyo shiidaalka oo ay sheegeen inuu si weyn kor ugu kacay maalmahan danbe.
Derawladda gawaadhidda ay dadweynugu isticmaalaan ee ka dhex shaqeeya Berbera waxay muujiyeen in arrintaasi ay dhibaato ku keentay noloshoodii iyo xataa mida qoysaskoodda.
Waxaanay ganacsatadda shiidaalka soo dejiya iyo kuwa iibiyaba ku dhaliileen in ay si xawli ah u kordhiyeen qiimaha shiidaalka, isla markaana aanay garanaynin sababta keentay xiligan.
Kuwaasoo maanta magaaladda Berbera ka dhigeen mudaharaad ay ku muujinayaan qiimaha shiidaalka ee la kordhiyay iyo saamaynta xun ee ay ku keentay.
Qaar ka mida derawaladda gaadiidka dadweynaha Berbera ka dhex shaqeeya oo ay warbaahintu wax ka waydiisay cabashadood ayaa dhamaantoodba si isku mid ah u muujiyay dhibaatadda ay kala kulmeen kor u kaca qiimaha shiidaalka.
Derawaladan cabaya ayaa u badan kuwa ku shaqaysta gawaadhida yar yar ee loo yaqaano Tagaasida ee ay dadweynaha shacabka ah raacaan ee ka dhex shaqeeya gudaha iyo deegaamadda u dhaw dhaw magaaladda Berbera.
Waxaanay sheegeen in iyadoo aanu jirin wax kor u kac ah oo ku yimid guud ahaanba dunidda qiimaha shiidaalka in ay ganacsadu ku kordhiyeen, maadaama sida caadiga ah ay isku xidhan yihiin suuqyadda caalamka ee ka ganacsiga shiidaalka.
Geesta kale, gaadiidleydan cabanaya ayaa dawladda Somaliland ugu baaqeen in ay arrintani wax ka qabato, isla markaana ay qiimayso dhibka ay ku keenayso bulshadda noloshoodda ku debarra gawaadhida.
DAAWO: Cabashadda Qaar Ka Mida Derawadda Gaadiidka Berbera:
Hargeisa Press.com/Hargaysa Somaliland.
