Muqdisho (Tayosame News) Ciidamo ka tirsan Milatariga Soomaaliya oo marayay saldhiga degmada Kaaraan ee Gobalka Banaadir ayaa xalay dilay darawal kaxeynayay Mooto bajaaj.
Dilka ayaa yimid kaddib markii ay murmeen darawalka mootada iyo ciidamada kaasoo aan la ogeyn waxa uu salka ku hayey.
Wararka ayaa sheegaya in askartii dilka geystay ay baxsadeen, waxaana goobta gaaray ciidamo kale oo ka tirsan kuwa amaanka, iyadoo meydka marxuumka mar dambe loo qaaday xarunta CID.
Goobjoogayaal ayaa sheegay in dilka uu ka dhacay afaafka hore ee saldhiga degmada Kaaraan ee Gobalka Banaadir, iyadoo ciidamada booliska ee saldhigaas joogayna aysan waxba ka qaban askarta kale ee dilka geysatay.
Darawalada mooto bajaajka ayaa dhibaatooyin kala kulma ciidanka dowladda, iyadoo mudooyinkan ay joogto ka noqdeen magaalada Muqdisho iyo gobolada dalka qaarkood dilalka loo geysto darawalada bajaajka.
