Dararweyne (Tayosame News) Ciidanka qaranka ayaa shaly galab kala xili danbe kala dhex galay beelahii ku dagaalamaayay deegaanka Dararweyne, dagaalkaasi oo labada beelood isku kaliyaysteen waxa ku kala dhintay rag aad u tiro badan waxana ay dad goob joogayaal ahi noo xaqiijiyeen in dhan ay ka dhinteen 11 ruux xaga dhanka kalena ay ka dhinteen lix ruux, dhaawaca ayaa isna tiro beelay labada dhanba waxa jira dhaawac halis ah iyo mid fudud intaba.
Waxana gabi ahaanba xalayto si toos ah isu taagay dagaalkaasi waxana goobahii lagu diriraayay xoog kula wareegay ciidanka qaranka oo aad u gaashaaman, hase ahaatee waxa labada dhanba xalay bilaabmay gurmado hor leh oo ku soo biiraaya, waxna laga cabsi qabaa in maanta ah ay dagaalo kale ka bilaabmaan,, sida Siigadheere, Bocosha iyo Sabawanaag madaama oo ay labada dhan aad u hubaysan yihiin abaabulkooduna uu aad u sareeyo.
Beelahani oo ood wadaag ah ayaa colaadoodu soo noq noqotay inkasta oo nabadayntooda aad loogu gurmaday loona dhex galay, waxna jiray heshiis kama danbays ahaa oo dhawaan dhex maray labadaasi beelood oo lagu soo afjaray wixii hore u dhex maray ee colaad ahayd, colaadani soo cusboonaatay ayaa ka dhalatay nin si badheedh ah loo dilay taasi oo sababtay in colaadani ay hadana mar kale soo cusboonaato.
