Liverpool ayaa soo dhaweyneysa Man United kulan darbi ah oo la baasna doono xiliga qadada ee soo aadan, balse waxaa lasoo calaameynayaa dhawr isku dhac oo go’aamin kara natiijada ciyaarta – inkastoo ay gacmahooda ka bixi karto hadii ay go’aanno garsoore hareeyaan ciyaarta.
Garsoore Martin Atkinson ayaa loo soo doortay kulanka ugu xifaaltanka adag – ciyaaraha horyaalka Premier League – Anfield ayaana la isugu bira-tuman doonaa iyadoo Jose Mourinho uu raadinayo guushiisii labaad ee waayahiisa uu ka gaaro Jurgen Klop..
Matip vs Lukaku:
Daafaca reer Cameroon waa kan ugu hanadsan ciyaartoyda Reds markey noqoto in la miisaamo dhanka daafaca, waxaana dusha ka saaran masuuliyadda ah inuu gool u diido weerarka Man United.Romelu Lukaku waa weeraryahanka qura oo uu heysto Jose Mourinho kaas oo ah kan ugu qaalisan ee xagaagii lasoo dhaafay, sidaas darteed waxaa hubanti ah in labadaan xidig ay ku dagaali doonaan diilinta ganaaxa Reds.
Guusha iyo Guuldarada kulankaan ee labada kooxood qeyb muhiim ah ayey ka leeyahiin
Coutinho vs Herrera
Philippe Coutinho waa ciyaariyahanka ugu qatarsan ee ay heysato Liverpool, waa kan ugu weyn oo ay ka cabsi qabto Red Devils iney dhibaatada kala kulanto – waana wiil ku wanaagsan inuu toogto shabaqa kooxda kasoo horjeeda.
Inkastoo aan la ogeyn doorka loo adeegsan doono hadana Herrera ayey u badan tahay in loo idmo doono inuu si cadaadis leh u raaco xidiga reer Brazil.
Joojinta Philippe Coutinho – waxey Man United ka yareyneysaa halista Liverpool, halka bandhigiisa wacan uu dhib weyn u geysan karo.
Mo Salah vs Ashley Young
Mohamed Salah waa mid ka mid ah ciyaartoyda ugu firfircoon ee Reds u matalaya kulankaan tiiyoo ay jirto inuu si weyn ula xifaaltami doono tababarahiisii hore Jose Mourinho kaas oo aan wax fursad ah siinin waqtigiisii Chelsea.
Wuxuu wajahi doonaa Ashley Young kaas oo qaab ciyaareed wacan ku jiray kulamadii ugu dambeeyay ee kooxda Red Devils – waana laba ciyaartoy oo ugu yaraan dhib u keeni kara labada kooxood kulankaan.
