Sports (Tayosame News) Jamaahiirta Manchester United ayuu war farxad lehi uga soo yeedhay xarunta tababarka kooxdooda ee Carrington kaddib markii ay tababarka kusoo laabteen xiddigo badan oo muhiim ka ah safka tababare Mourinho oo hore dhaawacyo ugu maqnaa.
Jamaahiirta United iyo tababarahooda ayaa hore uga wer-wer qabay in dhaq dhaqaaq xumadii suuqa kala iibsiga ay ugu darsanto dhaawacyo ayaa markan helay war yididiilo gelin kara kaddib markii ay si lama filaan ah tababarka kooxda ugu soo noqdeen xiddigo la filayay inay mudo dheer maqnaadaan.
Xiddigaha kooxda kusoo laabtay ayuu kamid yahay kabtanka kooxda ee Antonio Valencia oo uu dhaawac kusoo gaadhay kulamadii saaxiibtinimo ee ka horreeyay xilli ciyaareedka, Khadka dhexe ee Ander Herrera oo dhaawac ku seegay kulankii furitaanka horyaalka ee Leicester City.
Si lamid ah Nemanj Matic oo ah xiddig muhiimad weyn u leh shaxda tababare Mou isla markaana ah isku xidhaha ugu muhiimsan ee isku dheelitirnaanta ku sameeya shaxda kooxda ayaa kusoo laabtay kooxda, Matic ayaa hore loo filayay inuu wakhti badan ka maqnaan doono kooxda balse waxa si layaab leh loogu arkay tababarkii maanta.
Sidoo kale xiddiga uu tababare Mourinho taageeraha u yahay ee Jesse Lingard iyo Ashley Young oo kamid ahaa xiddigihii xulka England usoo matalay koobka aduunka ayaa kamid ah wejiyada maanta lagu arkayay Carrington.
Haddaba halkan hoose kaga bogo sawiradii laga qabtay Red Devils ee tababarkii maanta.
