Hargeisa (Tayosame news) Shil baabuur oo aad u naxdin baddan ayaa xalay xilli danbe oo saacaddu kusii durkaysay 2 habeenimo, waxa uu ka dhacay gudaha magaalada Hargeysa gaar ahaana xaafadda Saba-Xareed ee Koonfurta magaalada Hargeysa.
Gaadhigan oo ahaa kuwa raaxada ee loo yaqaan Indho-cadde ayaa waxa saarnaa Laba qof oo dhalinyaro ahaa,kuwaas oo kasoo dareeray xaflad Aroos.
Waxaana gaadhigan oo xawaare sare ku soconayay uu ku dhacay Sabbada Saba-xareed,waxaana ka dhashay shilkaasi Baabuur khasaare dhimasho iyo dhaawacba leh.
Goob joogayaal aan goobta ku gaadhnay waxay xaqiijiyeen in Saddex qof ay ku dhinteen gaadhiga,balse warar kale oo soo if baxaya ayaa waxay iyaguna sheegayaan in ay dhinteen Shan qof oo uu ka badbaaday hal wiil kaas oo koomo ku jira sida ay wararku sheegayaan.
Taliyaha ciidanka Taraafikada Somaliland ahna afhayeenka Ciidamada Booliska oo aanu isku daynayin aanu khadka telefoonka kula xidhiidhno si aanu u waydiino khasaaraha rasmiga ah ee ka dhashay shilkaasi baabuur ayaanay noo suurto galin telefoonkiisa gacanta oo uu ka jawaabi waayay awgeed.
