Sports (Tayosame news) Tababare Jurgen Klopp ayaa shaaca ka qaaday inuu iska diiday fursad uu ku maamuli lahaa Man United ka hor imaatinkiisa horyaalka Premier League, balse markaan wuxuu kashifay sababtii ka dambeysay inuu iska diido.
Dhawr jeer ayuu macalinkaan reer Jarmal ka dhawaajiyay iney xiriir lasoo sameeyeen Red Devils, balse waxey noqoneysaa markii ugu horeysay inuu taageerayaasha kubadda cagta la wadaago sababta ka dambeysa inuu iska diido.
50-jirkaan wuxuu qiray iney kooxda ka dhisan Old Trafford lasoo xariirtay ka hor inta aan Van Gaal loo magacaabin xilka, balse wuu iska diiday iyadoo xiisahaan la sheegay inuu soo jiitamayay dhawr bilood.
Koox walba oo qaaradda yurub ah ayaa ku baraarugtay awoodda uu leeyahay Jurgen Klopp markii uu laba horyaal oo xiriir ah u qaaday Borrusia Dortmund iyadoo Bayern Munich ay marqaati ka tahay, balse marnaba ma uusan dareemi in Old Trafford uu yahay meesha ugu saxan oo uu ku shaqeyn lahaa.
Jurgen Klopp oo la hadlayay Phil Thompson oo ka tirsan Sky Sports wuxuu yiri: “Haa, waxaa jiray xiiso – Manchester United, haa, wey i xiiseynayeen sanad ama sanad iyo bar ka hor, balse ma dareemeynin iney igu haboon tahay”
“Ma dhihin Red Devils maahan kooxdeyda, balse ma dareemenin iney haboon tahay”
Klopp ayaa intaas raaciyay: “Kooxo badan ayaa isoo wacay oo aan u sheegay inaan fursad u heynin – waxaan u baahanahay inaan fasax helo hadda, xitaa xaaskeyga wey ogeyd, hadii ay Liverpool isoo wacdo waan aadayaa”
“Marka ay Liverpool isoo wacday, ma heysan wax fursad ah, waxey aheyd xilli hore oo qorshaheyga ah “WOW” horay u soco”
